نارووال کے قریب سکھوں کے مذہبی مقام کرتار پور گوردوارہ کے گنبد تیز ہواؤں کی تاب نہ لا سکے اور اڑ کر دور جا گرے۔

روزنامہ جنگ کے مطابق ایک سال سے بھی کم مدت میں تیار کئے جانے والے گوردوارے کے گنبد سیمنٹ اور سریے سے بنانے کی بجائے فائبر گلاس سے تیار کئے گئے جب کہ ان کو جوڑنے کے لئے نٹ بولٹ بھی استعمال نہیں کئے گئے۔

میناروں، درشن دیوڑھی، میوزیم، دیوان استھان، لنگر خانے کے قریب گوردوارہ کی بلڈنگ پر لگے آٹھ گنبد تیز ہواؤں میں اڑ کر زمین پر گرنے کے بعد ٹوٹ پھوٹ کا شکار ہو گئے۔

سرحد پار سکھوں کی جانب سے گوردوارہ کرتار پور کے گنبدوں کے ٹوٹنے پر شدید غم و غصے کا اظہار کیا جارہا ہے۔

وزیر سائنس اینڈ ٹیکنالوجی فواد چوہدری نے اپنے ٹویٹ میں لکھا ہے کہ انہوں نے وفاقی وزیر مذہبی امور نور الحق قادری سے اس معاملے کی تحقیقات کرنے کی درخواست کی ہے۔